بغيت نشري الذهب في المغرب ولكن اشناهو النوع اللي غيربحني

 احسن انواع المجوهرات الذهبية بالمغرب اللي غتربحني 

في هد المقالة غنهضر على طريقة شراء الذهب في المغرب واحسن انواع المجوهرات الذهبية في المغرب اللي غتربحني الى شريتها وعاودت فيها البيع بعد مدة طويلة. غنقارنو بين هده الانواع ديال المجوهرات ونشوفو افضلها واحسنها من حيث العائد الاستثماري وهامش الربح ديالها. وكفاش نتفادى انني منشريش الذهب اللي مغيربحنيش ونضيع فلوسي ووقتي.

علاش خصني نشري الذهب في المغرب فهد الوقت

الذهب كما هو معروف من احسن انواع الملاذات الامنة يعني من افضل الاصول المالية الي اقدر الواحد اخبي فيها فلوسو واخليها متفقدش القيمة ديالها مع الوقت , كما واقع دبا حاليا فالمغرب 100 درهم اللي كنا تنتقداو بيها تقدية ديال السيمانة مبقات تتجيب لينا حتى تقدية ديال النهار , هدشي اللي تنسميوه بالتضخم يعني الفلوس تتفقد قيمتها مع الوقت .

دكشي علاش ناس اللي اللي مطورين ومثقفين ماليا ديما تيخبيو فلوسهم فشي اصل مالي بحال العقار ولا الذهب ولا الاسهم ولا حتى استثمروها فشي مشروع عوض ميخبيوها فالبنكة ولا فالمخدة حتى تفقد قيمتها.

الذهب حاليا في المغرب في الفترة ما  بين 2024 ل 2030 هو أحسن اصل مالي للاستثمار 

ولكن علاش خصني نشري بالضبط الذهب , تيقلو اغلب الخبراء في الاستثمار بلي افضل طريقة باش تستثمر فلوسك وضمن انهم اربحوك هو انك تقسمها بين اصول مالية مختلفة متستثمرهاش في اصل مالي واحد حيث مكيناش شي ضمانة 100 في المئة ضمن ليك ان دك الاصل غيربحك . 

خصوصا حنا فواحد العالم اللي ممستقرش الحروب والازمات السياسية والاوبئة والكوارث الطبيعية غير داير بينا , دكشي علاش مخصناش نجمعو البيض اللي عندنا كامل فسلة وحدة لا طيح واتهرس كامل , شوية من فلوسنا فالعقار وبزااف فالذهب وشوية فالاسهم فالبورصة ديالنا فالدار البيضاء.

ولكن مزال مجاوبناش على السؤال , علاش بالضبط الذهب

كن كنا مواطنين امريكيين او في اي دولة اخرى من غير المغرب , كنت غنقليك نوع استثماراتك بطريقة متساوية فكل الاصول المالية ولكن فالمغرب , ننصحك تشري شوية فالعقار وشوية فالاسهر وبززاف فالذهب يعني 35 في المئة من الامول اللي غتخصصها للاستثمار في مختلف الاصول المالية .

علاش الذهب في المرتبة الاولى في الاستثمار 

حيث تاريخيا مند استقلال المغرب معمر سعر الذهب في المغرب فكل عام ننقص الثمن ديالو للغرام دائما في كل سنة الثمن دياو تيتزاد , عكس الاثمنة ديال الذهب على برا المغرب وفي البورصات العالمية تيكونو فيه سنوات طالع وسنوات هابط بل احيانا عدة سنوات وهو هابط او ثابت , اما فالمغرب دائما السعر ديالو فصعود , والمبيان اللي فالاسفل تيبين لينا هدشي من سنة 2014.

تطور قيمة ثمن الذهب في المغرب من سنة 2014 ل 2024

من بين الاسباب اللي تخلي وغتخلي ثمن الذهب في المغرب اطلع للسماء في السنوات الجاية , هو تزايد النمو الديموغرافي في المغرب والسياح وتزايد الاقبال على الذهب بالرغم من محدودية كمية الذهب اللي معروضة في السوق المغربية , يعني كمية الذهب في المغرب ثابتة والاقبال عليه فتزايد يعني الطلب اكبر من العرض مما يعني ان قيمتو غتزاد اكثر مع الوقت.

اسباب ارتفاع قيمة الذهب في المغرب سنة 2030

بلا منشيرو لاسباب كثيرة اخرى سبق ليها اشرت ليها فهد القالة هنا بالتفصيل , واللي من بينها زيادة قيمة التضخم في المغرب وغلاء الاسعار , والتعويم الكلي للدرهم , وتنضيم كأس العالم المغرب 2030 , واحتمال نشوب حرب اقليمية بين اسرائيل وايران وحلفائها في الشرق الاوسط وتطور الحرب الروسية الاوكرانية. 

دبا نجاوبو على السؤال , أشنو احسن النوع دالذهب اللي غيربحني ؟

من افضل انواع طرق الاستثمار في الذهب واللي امنة هي تشري سبائك الذهب , ولكن هد الطريقة مكايناش في المغرب اولا لان كمية الذهب كما قلنا فالمغرب قليلة وثانية لانها ممنوعة في المغرب بالنسبة للمواطنين العاديين وتيتعاملو بيها غير التجار الكبار اللي تيصنعو منها المجوهرات ديال الذهب .

اوا اشنو الطرق اللي ممكنة واللي مربحة 

فالمغرب شراء الويز واللي تيتسما كدلك بالنصاص فنضري هو افضل طريقة للاستثمار وشراء الذهب في المغرب , لان هد اللويز مفيهاش كثرت التلحيمات وكثرة الصنعة اللي تتفقد للذهب قيمتو , ثم سلاسل ديال الرادكو والنبالات  , السراتل وعصير الصابون , هدي كلها مجوهرات مزيانة للاستثمار في الذهب ومتتفقدش قيمتها لانها تتباع بالميزان يعني بالغرام عند الدهيبي .

وبعد على انواع الذهب اللي تتباع بالموديلات الى بغتي تستثمر فلوسك اما الى بغتي الزينة فشري اي نوع من المجوهرات اللي عجبوك ولكن خصك تعرف ان قيمتها غتنقص مع الوقت وفلوسك غيضيعو.

هد الجدول اللي فالاسفل تيشير لافضل هد الانواع ديال الحجوهرات الذهبية اللي عندها عائد ربحي كبير فالمغرب

الويز	رادكو	غرميت	سراتل	عصير الصابون	النبالات
لويز قدين فرانك	قلادة رادكو	غرميت يدوية	سراتل يدوي	دمليج يدوي	نبالة يدوية

اهم الاسئلة الشائعة عن شراء الذهب في المغرب 

واش نشري الذهب من دبا فالمغرب بالفلوس كلها اللي دخرتها باش نربح منها بززاف

لا , علاش لانه خصنا نفرقو بين فلوس الادخار وفلوس الاستثمار . خصنا نقسمو الاجرة الشهرية ديالنا لعدة مصاريف واقسام , اللي من بينها كمية الفلوس اللي غنخصصها للادخار بهدف الطوارئ لا طرى شي حاجة مفاجئة بحال شي مرض الله احفض ولا كسيدة ولا شي سفرية مفاجئة ...

وفلوس الاستثمار على الاقل 15 في المئة من الاجرة الشهرية ديالنا ونخصص منها واحد 7 في المئة للذهب نبقا نجمعها كل شهر حتى تعطني راس مال اللي نقدر نشري بيه لويزة ولا نوع من المجوهرات الذهبية اللي هضرنا عليها.

واش نبيع العقار اللي عندي ونشريه كلو ذهب 

لا . كما قلنا افضل طريقة للاستثمار هي اننا ننوعو من الاستثمارات ديالنا نشري شوية من العقار شوية بزاف من الذهب , شوية من الاسهر ...