علاش خصني نشري الذهب فالمغرب قبل كأس العالم 2030

 خصك تشري الذهب في المغرب قبل كأس العالم 2030 الى بغتي تستافد من الهمزة

همزة واشمن همزة تتسنا المغاربة خصوصا اللي سبق ليهم شراو الذهب او اللي يلاه شراو الذهب , بالاضافة لانه باقي فرصة اللي باغي اشري الذهب واستافد من طلوعو قبل كاس  العالم 2030 اللي غينظيم في المغرب ومن قبل منو كاس افريقيا وكاس العالم للاندية, الحاصول الواحد اضرب الحديد ما حدو سخون.

شحال ساوي الذهب دبا ؟

الذهب الغرام اسيدي او لالة فايت دبا 650 درهم للغرام فمختلف الاسواق والقساريات ديال الذهب في المغرب , غير البارح بتاريخ 17 غشت تباع وتشرى من طرف التجار بينتهم ب615 درهم للغرام عيار 18 اللي تيتباع فالمغرب. 

للاشارة فثمن غرام الذهب كما فالمنحنى في الصورة اللي فالتحت راه طلع الثمن ديال من 100 درهم ف 2014 ل 650 درهم فهد السنة يعني تضاعف الذمن ديالو اكثر من خمسة دالمارات , يعني كن شريتي الذهب في 2014 احسن ليك اربع مرات الى شريتي شي بقعة ارضية حيث اغلب البقع الارضية فالمغرب متضاعفش الثمن ديالهم من 2014 لدبا الى تزاد الثمن ديالهم متيضوبلش ف10 سنين .

اشمن نوع الذهب نقدر نشري فالمغرب ؟

في المغرب في الوقت الحالي ما عندناش السبايك ديال الذهب وبالتالي منقدروش نشريو السبايك , تقدرو تلقاوهم عند التجار الكبار ولكن متيتباعوش للناس العاديين تيتباعو غير للتجار واللي عندهم رخصة الاتجار في الذهب والصياغة ديالو .

في الوقت الراهن نقدرو نشريو الذهب بغرض الاستثمار ولكن ماشي اي ذهب , الى بغنا الذهب للزينة نقدرو نشريو اي شكل او موديل عجبنا ولكن المشكل هو ان السعر ديالو غينقص مع الوقت حيت ماشي كلو مصنوع من الذهب فالغالب تيكون مخلط معاه الفضة ولا النحاس وكثرت التلحيم .

حيث هد النوع ديال الذهب فاش تيعاودو اشريوه الذهيبية عند الناس تيعاودو ادوبوه باش اصيبو منو موديلات جداد اللي تيتمشاو فالوقت الحالي , والى دوبوه فالغالب تيلقاو فيه الذهب قليل دكشي علاش تيشروه بثمن رخيص .

دكشي علاش اللي باغي اشري الذهب للاستثمار على المدى البعد ودوير الزمان خاصو اشري الذهب اللي تيتباع بالغرام بالميزان ماشي بالموديلات ولا بالخدمة ديالو , اشري الويز مثلا اللي فيها غير الذهب او اشري سنسلة ديال الرادكو ولا السراتل او النبالات ولا عصير الصابون هدو هما انواع المجوهرات اللي تيربحوك ومتيفقدوش القيمة ديالهم مع الوقت.

علاش خصني نشري الذهب اليوم في المغرب

الى جينا للواقع الذهب متيتكال متيتشرب متيعالج شي مرض فالوقت الحالي , ولكن القيمة ديالو فالقلة ديالو من قديم الزمان الناس فاش اكتاشفوه درو منو كالجلوق ديال الفلوس فالبيع والشرا ديالهم , ومع الوقت ولا الانسان تيتعامل بيه بحال الفلوس وحيث القيمة ديالو ولات غالية مقدرش الانسان اصايب منو بززاف دالجالوق يعني العملات باش اتم البيع والشرا بيهم بشكل يومي خصوصا ان غرام منو ولا غالي بزااف دكشي علاش ولا تيتعاملو بيه غير الناس اللي مثقفة وخصوا اللي عندها ثقافة مالية.

 الموضوع طويل ولكن غنختاصرو فان الذهب هو شي حاجة ثمينة وديما الثمن ديالها تتيزاد خصوصا الى كانت شي حرب ولا الخلعة بين الناس وبين المستثمرين الكبار وبين الدول ولا الى  الفلوس تتفقد القيمة ديالها بسباب التضخم.

دبا اجيو نعرفو علاش ثمن غرام الذهب في المغرب غيوصل للسماء.

من بين الاسباب الكبيرة هو الحرب اللي نايضا دبا بين روسيا واكرانيا وبين اسرائيل وفلسطين وايران من جهة اخرى , وبحكم المغرب غير تيستورد الذهب وحيث قليل عندنا,  فالثمن ديالو غيرتافع حيث الرواسا والاوكران اللي شاعلا عندهم الحرب غيشرو الذهب بززاف,  فا راه غتقل الكمية ديالو فالسوق العالمية,  يعني الى بغاو التجار المغاربة اشريوه من برا غيتقام عليهم غالي بززاف يعني غيرشروه غالي وغيبعوه غالي للمغاربة.

كدلك التضخم اللي كاين فالمغرب دبا وغلاء الاسعار الناس ولات تتلاحض ان فلوسها مبقات عندها قيمة, 200 درهم اللي كانت تتقدهم للكفة ديال سيمانة مبقات تتجيب ليهم حتى تقدية ديال نهار. دكشي علاش الناس ولات تفكر فالحاجة اللي تخبي فيها الفلوس اللي شايطة عندا باش متنقسش القيمة ديالها مع الوقت وتزاد قيمتها , هنا كلشي غيفكر فالذهب دكشي علاش كلشي غيطيح عليه وغيقل فالسوق والثمن ديالو غيطلع للسماء.

شاهد ايضا : سعر الذهب للغرام بالمغرب لا تفوت فرصة الاغتناء من الذهب

دكشي علاش تنقول ديمة ضرب الذهب ما حدو سخون

من الاسباب اللي غتخلي ثمن الذهب اتفرغع هو انتعاش السياحة بالمغرب وقطاع الصناعة التقليدية واللي داخل فيها قطع الحلي والمجوهرات في المغرب , اشنو اللي اخلي هد القطاع انتاعش هو السياحة سواء الداخلية والخارجية واللي مصدرها غيجي من تنظيم كاس افريقيا ف 2025 وكاس العالم ف 2030.

من الاسباب اللي تقدر ترفع من ثمن الذهب في المغرب هو ما يسمى بالتعويم الكلي للدرهم وهدا موضوع خصو بحث ومقالة لبوحدو نخليوه حتى لاقرب فرصة ونتكلمو عليه.

الموضوع طويل ولكن قريب نخصص ليه فيديو واللي عندو اي تسائل اطرحو فالتعليقات